拉筋後的進展
四月 3rd, 2012
寫過好多次拉筋拍打對身體有幾好，我亦經常同親戚朋友介紹，可能礙於我身型巨大，令人對我講拉筋拍打對身體好有質疑，所以，大部份聽完就算。
終於，出現咗個真人實例俾啲親戚朋友睇，當然，嗰個唔係我，係我媽，阿姚太。
姚太四十幾歲時，由於工作勞損，雙膝經常痛。 當年，姚爸爸搵咗個相熟嘅骨科醫生帶姚太去睇，打過兩次類固醇喺膝頭止痛。 當年醫生打第一針時有講明打到第三針真係隨時唔行得，而且，依家打咗係會止痛，但後遺症係過多十年八載，雙膝問題會好好好嚴重，隨時未夠六十歲已經會退化到七十歲咁。
結果，姚太喺打完針之後大約四五年，膝痛嘅問題已經嚴重到行到拐吓拐吓。
喺過去嗰十幾年黎，我見盡姚爸爸幾咁努力地搵偏方、食療、成藥、藥膏藥油俾姚太，希望佢可以舒緩一吓腳痛嘅問題，總之，阿甲阿乙話邊樣好、報紙雜誌介紹啲乜野，姚爸爸都會買返黎俾姚太試，甚而到姚爸爸自己中咗風，佢依然不改呢個習慣。
到姚太大約五十幾歲時，醫生已經話佢雙膝嘅軟組織已經退化晒，等同一個七十幾八十歲老人嘅膝關節情況。
08年時，醫生提議過姚太換人工關節，姚太當時答應咗，醫生安排咗佢喺半年後做手術，手術前要覆多次診睇吓情況。 點知到再覆診時，姚爸爸已經中咗風，姚太講俾醫生知要照顧姚爸爸，如果做手術的話，唔知幾時先落到床，咁我自己一個照顧姚爸爸就好麻煩，結果，個醫生記低咗個情況，只要姚太方便嘅，再通知佢地，咁可以排番個快期俾佢。
姚爸爸中風之後，好多時我呢頭幫姚爸爸捽完手腳洗乾淨對手，又要幫姚太捽腳，有時姚太幫完姚爸爸捽完順便幫自己捽吓。 總之，問我邊隻護膚品好用我未必知，但問我邊枝活絡油有用我實知。
姚太對腳差到係連辦姚爸爸後事時，長生店個老闆娘都唔忍心叫姚太跪足一晚，直情搵張凳俾姚太坐。 姚太當晚返到屋企都有同我地講，佢覺得真係好對姚爸爸唔住，竟然連跪都跪唔到，但姚爸爸咁愛姚太，又會唔會介意呢啲? 而且，真係跪唔到就跪唔到架啦。
直到上年12月，咁岩政府派六千蚊，我哦咗姚太一輪，佢終於肯俾我買張拉筋凳返黎。
買咗張拉筋凳返黎，係威係勢咁拉過一次，跟住就摺番埋。 過咗無耐，姚太提議同我交換番間房，將張拉筋凳擺入佢房開咗佢，等佢得閒可以拉吓，唔駛想拉筋時要我幫佢又開又拆。
終於，神奇嘅事發生了。
過年之後，姚太得閒，差不多日日起身，食飽飽做完家務，就自動自覺走去拉筋。 起初一星期，姚太話腳痛情況嚴重咗，佢擔心如果再咁落去真係要做手術，我叫佢俾啲耐性試吓再拉多排先，唔得先去做手術。
有日，姚太去買餸時撞見個識嘅太太，個位太太又係膝組織退化到行路拐吓拐吓，佢一見到姚太就問姚太係咪做左手術換人工關節，姚太話無，個位太太就問姚太食過啲乜，點解行得好咗咁多，姚太有同佢講話拉筋拉好咗，佢半信半疑咁簡單就得。
嗰次之後，開始陸陸續續有唔少街坊見到姚太都讚佢行得好咗好多，有好多人都以為姚太去做手術換咗人工關節。
我有留意到姚太無再好似之前咁成日嗌腳痛，日日拎住枝藥膏左搽右搽，亦無話會三更半夜腳抽筋，但我又真係唔多覺佢行得好咗咁多，好到好似換左人工關節咁。
直到有日同姚太出街，落小巴時，我伸手去俾姚太扶住我落嗰兩級，有個搽脂盪粉嘅師奶自言自語話"好人好姐咁巴閉要扶上扶落就咪鬼搭小巴啦"，我望望姚太，又真係"好人好姐"喎，佢雖然都有扶住我，但佢一野已經落咗小巴，平時佢係行得慢到連小巴司機都會話"企穩先好行丫阿姐"。
跟住同佢返大陸辦姚爸爸間屋嘅時，由於落錯車，姚太來回行咗兩次天橋，平時見到條天橋佢已經會話"有無得過馬路丫?"，呢次佢提都無提，慢慢行。
點知到搭巴士時，大陸啲巴士都唔知點設計，個位高到要上一級先坐到，但個一級高到差不多去到我膝頭(我認，我矮囉!!)，我都仲望緊點爬上去，姚太已經坐咗上個位到，連舅父見到都覺得神奇。
終於，我有同感覺得姚太對腳真係好咗好多。
之後有日隔離屋阿姨問我有無拉筋凳嘅資料可以借俾佢老公睇，佢兩個見平時姚太行路隻右腳好似拖住地抬唔起咁，依家行得好輕鬆，隻腳抬得起黎行，心思思想買張拉筋凳返黎拉吓筋。
嗰刻，我終於覺得日後要話俾啲親朋好友知拉筋對身體好，唔應該由我講，應該搵姚太黎講囉。
出門遇貴人
三月 26th, 2012
姚爸爸過身已經7個月，但大陸間屋一直都搞掂轉名手續，其實，喺辦完晒姚爸爸後事之後，我地已經第一時間搵親戚介紹咗個相熟嘅律師代辦國內公証，點知種種原因之下，一直都搞唔掂。
由於姚爸爸嗰半間屋位處舊城區，早喺十幾年前，附近都已經開始拆遷，偏偏拆到我地後面第三間就唔拆，我地惟有一直都安慰自己"遲啲拆賠償仲多丫"，點知等到姚爸爸過埋身，都仲未拆到黎。
雖然未拆到黎，但無可能等到真係拆到黎先去辦轉名手續，點知拖拉咗半年連辦張公証證明邊啲合法繼承人仲生存邊啲已經過咗身都未搞掂。 律師嗰邊只係不停叫我地自己想辦法查資料，但我地真係東奔西跑周圍去問去查都查唔到我地需要搵嘅資料。
可能姚爸爸心痛姚太為咗呢件事茶飯不思，竟然無啦啦有戲劇性發展。
有日個律師同姚太講，話大陸好似又改過繼承法，照佢估計我地現有嘅資料足夠辦張公証，叫姚太自己帶晒啲文件返去問，如果得就返黎同佢講。
既然可以想嘅辦法都想過都唔得，惟有照做，點知返到去職員一睇，唔得，不過，佢真係好好人，係咁安慰姚太叫佢唔洗擔心，仲教我地返到香港就搵佢地香港分部個主任，個主任有辦法幫到我地。
結果，拖拉半年完全搞唔掂嘅事，喺5分鐘內搞掂晒，而且，價錢平過搵律師一半，仲要一次過搞掂，唔駛好似搵律師代辦咁，香港做完晒文件之後仲要自己返去確認份野先可以去到換張新屋契，依家直接喺香港搞掂晒，返到去直接去換屋契就得。
真係好感恩上天幫咗我地，更加感謝姚爸爸喺天上保佑。
養生食療-穀米、亞麻籽
三月 9th, 2012
之前試過嚴浩專欄介紹嘅油拔法、骨刺靈驗方、降膽固醇高血壓偏方，效果都好好，所以，決定試一試嚴浩專欄經常介紹嘅十穀米。
其實，喺超市見到有一台灣出產已經溝好嘅袋裝十穀米賣，不過，姚太話既然係諗住養生，就唔好慳嗰少少，寧願自己逐樣買，盡可能買有機嘅穀米返黎自己溝。
我其實買唔足十樣，我只係買咗有機蕎麥、有機燕麥米、有機薏仁、有機小米、糙米、原塊麥片。
不過，之前用小米煲過粥，由於我煲粥實在無姚爸爸同姚太咁叻，結果令姚太對小米有啲反感，除非自己食就會加小米，同姚太食晚飯就減去小米，加入新鮮准山。
雖然食譜話要加黑糯米，不過，煮過一次加咗黑糯米嘅穀飯之後，我同姚太大家都認為黑糯米都係留番黎煲糖水算；而茨實就因為姚太厭已經成四五樣料，再加的話就太多，唔肯俾我加。
我同姚太由27/02開始晚飯食穀飯，除咗一日出街晏咗返屋企浸唔切米之外，咁多日都以穀米代替白米，餸菜照常。
可能我年青少少，效果未咁快見，但姚太自從姚爸爸過身後，睡眠質素其實麻麻，以往姚爸爸喺到時，佢瞓落床最多三個字就瞓著，近半年佢可能碌個幾兩個鐘都未瞓得著，好多時三更半夜醒咗，成晚都瞓唔番著；而且，以往佢濕重到好多時瞓覺會流口水，甚至，明明瞓咗八個鐘，依然個人仲覺好攰。
食咗穀飯大約三日，姚太話瞓覺已經唔駛碌成個鐘，大約15-20分鐘左右就瞓得著，仲一覺瞓到天光，就算醒左再瞓都好快瞓得番；而且，瞓覺時無再流口水；就算瞓得六七個鐘，瞓醒都唔覺太攰。
前日，姚太煮煮下飯時，我喺側面一睇，咦，乜佢個肚腩忽然細咗嘅，然後，姚太就淡淡然話"係咩? 我其實又唔太覺丫，不過，我都覺得妳個肚腩細咗啲喎"。 啲咋?
當然，減肥都係養生中主要一環，始終，過重對身體嘅壓力都好大，但食十穀米主要都係想身體健康平安，而唔係單單想減肥咁簡單，瘦咗亦只可以當係bonus。
睡眠質素我一向都Ok嘅，雖然，偶有瞓唔著嘅時候，但又唔算話好多，不過，我唔知係因為想自己身體更健康定係食咗十殼飯嘅關係，呢段時間，我多數點幾兩點就眼瞓，三點前一定上床瞓，今晚已經破晒例四點幾都未瞓。
但食嘢嗰方面我就發現咗樣幾奇特嘅事，始終十穀米都係粗糧，消化需時，飽肚感係大啲，呢段時間我真係自動自覺戒宵夜，因為真係仲好飽，只係有日峰峰請我食過宵食，其餘日子真係晚上七點幾食過飯之後，一直到第二日起身先會覺得有啲肚餓。
除咗食穀飯之外，我連飲野都唔放過，買埋有機十穀粉返黎加入咖啡奶茶到飲，口味都ok，有啲似燕麥糠，但質感比燕麥糠滑啲。
其實我一直最想試嘅就係亞麻籽，因為之前睇嚴浩寫過"亞麻籽治免疫系統"，除咗一般細菌引起嘅病外，好多病都源自免疫力低，所以，增強免疫系統係好重要，而且，我免疫力近年都麻麻，單睇之前皮膚出過事就知我嘅免疫系統有幾強。
結果，連亞麻籽都買埋返黎，專欄寫最好磨粉，磨粉後15分鐘內食完，免得養份氧化，原本諗住喺淘寶買部磨咖啡豆嘅磨返黎，但諗諗吓啲亞麻籽咁細粒都唔知磨唔磨到，就去買咗個舂返黎諗住舂碎佢。
點知亞麻籽原來硬到咁，舂到我手軟先舂得碎，但離粉狀仲差好遠，而且，佢有陣陣嘅草腥味，我真係有啲懷疑如果唔買有機亞麻籽的話，個陣味會唔會無咁勁呢?
結果，亞麻籽我只係食咗一次，我決定留番佢，喺淘寶買個磨返黎先再食。
食咗一日基本上都唔會有乜明顯效用架啦，不過，亞麻籽除咗對免疫系統好之外，仲有個好處，就係… …對腸胃好好，可以清腸胃，我只係食咗嗰兩茶匙，結果，又與廁所為伴成個鐘。
要身體轉變唔係一朝一夕嘅事，要令身體好亦唔可以喺朝夕間做到，惟有努力堅持先得，睇黎我都要好好努力改善吓先得。
自己動手整甲 二
二月 26th, 2012
姚太係個唔喜歡打扮嘅人，佢會著得整整齊齊，但連飾物都好少帶，除咗結婚介子同隻玉鐲外，佢會帶嘅就只有耳環，化妝更係零，頂多偶然去飲時，會叫我幫佢掃掃粉底搽搽胭脂搽下唇膏就算，對手甲就更加十年都唔會搽一次指甲油。
偏偏生著個女鍾意扮靚，雖然口話鍾意扮靚，化妝品買到一籮籮，但其實又唔係真係成日都化妝，至少，見過我素顏嘅朋友總比見過我化妝嘅多。
近一年愛上搽指甲，但都只係有限度去搽，有時搽足一個月，個個星期換款，有時幾個月都唔會搽一次。
之前寫過篇"自己動手整甲"，我依然以自己動手整甲為忠宗旨，自己黎。
呢個係年三十晚，坐喺到一路睇電視一路整嘅，拜年期間個個親戚都讚整得靚，但查實隨便問個出去學過化妝整甲嘅人都知，呢啲真係好基本款黎嘅者。
呢個係上星期整，左下角係完成品，右下角純粹影完POST上FB俾愛人睇，多謝佢送套甲油俾我。 呢次真係整得幾靚，啲朋友都以為我係出去整嘅，甚至，有日搭"車立"有個街坊問我喺邊到整，讚我整得靚。
其實偶然整吓開心吓都OK嘅，不過，長期整就真係免啦，始終… …我呢個"未嫁C9"依然有唔少家務要我做，包括… …我依然唔多鍾意嘅洗碗，長期整對我黎講又真係唔太方便。
