一流去腫茶 川貝麥冬參鬚百合水
八月 29th, 2010
我個blog應該開始轉型，由beauty blog(！？)轉左做烹飪blog。
某日喺唐安琪個blog睇到有款去腫便暢茶，老實講，近一兩年唔想認老都唔得，竟然由以往日日"暢通無阻"演變到近日"不值一提"的地步，便暢茶本身已經好吸引，再加上戒煙後暴肥三十磅，進展到肥腫難分地步，去腫，非常吸引。
首先準備材料，包括麥冬
川貝(舂碎)
乾百合
參鬚
一般煲乜乜水的做法，水滾，掉晒d材料入去，煲滾。
差不多滾好，加糖調味。
哩個係屋企個冰糖盒，除左佢之外，屋企仲有片糖盒同咖啡糖樽。(請問關個糖盒乜事呢?)
簡單黎講，煲哩d乜水乜水，落冰糖最清甜。 落左糖再煲煲，熄火再焗焗即可。
基本上零技巧就能做到。
原食譜係每樣材料各二錢，不過，我買麥冬同參鬚問過掌櫃二錢有幾多，但一時唔記起問埋二錢即係幾多g，返到屋企磅乾百合同川貝就計到我… …。
雖然話605g等於一斤，一斤又等於16兩，大約37.8g為一兩，咁究竟係十錢為一兩定係十六錢為一兩呢，姚爸爸同姚太都各有各講，最後，我決定信姚太十錢為一兩。 咁二錢大約即係7.56g左右。
吾，我個磅仔其實係每10g為一度，咁惟有將所有材料改做10g，方便我睇之餘，橫掂姚爸爸同姚太都飲，就不如煲大煲d啦。
煲好，成品就係咁。
如果問我係乜味的話，真心話淡淡地無乜味，總之，又唔會太難飲，但亦唔好諗住會特別好飲囉。
原來我其實都唔係好腫架咋，事關飲完又唔覺話特別明顯瘦左、縮左，但姚爸爸血氣唔好，"阿好同阿腿"(左手左腳)都好腫，個晚飲完一碗，第二日竟然"阿好同阿腿"都消晒腫，如果十係最腫，平時"阿好同阿腿"一定腫到有十，飲完，最多得三。
連續煲咗幾日，"阿好同阿腿"都消晒腫，不過，始終姚爸爸個情況係血氣唔好，一唔飲就腫番，所以，正常人的話應該唔會話一唔飲就腫番，我估。
材料:
川貝 二錢(舂碎)、參鬚 二錢、乾百合 二錢、麥冬 二錢、冰糖 少許、水 適量。
做法:
煲滾煲水，一次過將個四樣材料掉晒入個煲到，煲到出味，大約廿至三十分鐘左右啦，落冰糖，再煲煲熄火再焗焗即可。
川貝原本係一粒粒，可以買個時叫掌櫃幫手手舂碎埋，或者，返到屋企自己舂又得，舂碎亦只係為左易出味既者，所以，舂幾碎應該無問題。 我都只係拎把生果刀背拍拍佢，拍碎d就算。
我覺得去腫一流，唔知經期前後水腫飲有無用或者岩唔岩飲呢。
醃鹹蛋
八月 29th, 2010
月前睇到簡易食譜裡教醃鹹蛋，唔太難，有興趣一試，因為出面賣嘅鹹蛋，對我黎講實在太鹹，自己整應該可以調到最岩自己嘅口味。
咁，某日就開始醃鹹蛋哩件事，首先準備雞蛋鴨蛋數隻
照簡易食譜教嘅一樣，洗淨、瀝乾水備用。
跟住就係煮鹽水啦，最簡單嘅方法，煲滾煲水，落(粗)鹽、花椒、八角，再滾滾佢。
煮好鹽水，放涼，同一時間就做下其他野。 簡易食譜係教哩個時候放d蛋入樽到，但，我搵唔到樽，惟有拎姚爸爸俾人呃嘅煲黎用。
個煲，某年，姚爸爸喺某百貨公司聽見個職員講"打唔爛架個煲"，跟手放低千五蚊買左一大一細返黎，然後，第二日細嗰個煲隻耳一撞就爛左，姚爸爸拎返去間野搵個職員問點解又話打唔爛但又會爛左隻煲耳，個職員答得姚爸爸好妙，"打唔爛唔代表唔會撞爛架喎!"。
跟住，姚爸爸返到屋企嬲到擺晒兩個煲入灶底，唔准用又唔准問。 咁，依家廚房唔係佢話事就梗係拎番出黎用架啦。
排好d雞蛋鴨蛋，將D鹽水倒入去，然後，等一頭半個月。
過左廿幾日，個煲都俾D鹽醃到白晒，D蛋又俾D鹽水浸到黃晒… …
我諗應該可以兜起佢地，準備食左佢。
原本白雪雪嘅鴨蛋已經醃到黃色殼，天然染色真係好靚。
咁，雖然醃過，但依然係未熟，當然，擺佢上飯面蒸熟佢就最方便快捷。
哩兩張相個幾隻係醃左廿二日，對我黎講已經好夠鹹，但，對其他人黎講應該唔多夠。 不過真係未醃夠時間，仲未流油，之後個d醃到廿五、廿七日，我厭鹹，但蛋黃流晒油。
其實唔知有無人知，即係我煮野真係隨意到離譜，份量完全唔跟食譜，原本簡易食譜教嘅係花椒八角各幾粒，不過，雜貨鋪有一包包嘅賣，咁就無理有幾多粒，用晒成包煮，而D鹽呢? 吾，咪用埋毛毛用淨個大半包海鹽囉，我都唔知有幾多，不過，我用左毛毛包鹽，我都未買番俾毛毛丫。
總之都係個句，人人口味唔同，最緊要較番岩自己口味。
講番D醃蛋，又估唔到幾好食，特別係D雞蛋，蛋白好滑，感覺奇怪地好似炒得好嫩嘅炒蛋白，而D鴨蛋嘅蛋白都無出面買嘅鹹蛋咁死死實實。
鴨蛋$1.3一隻，包花椒八角就$3，計落同平時買$5三隻嘅鹹蛋差唔多價錢，但我覺得自己醃好食D，所以，已經醃緊第二輪。 XD
七夕水
八月 16th, 2010
識我嘅朋友見到一樽二樽水，其實都未必會知發生乜事，但如果同時間又識miko的話，應該就會估到哩一樽二樽水就係傳說之中嘅七夕水。
之前睇miko寫七夕水睇左兩年，不過年年都唔記得裝，直到上年，miko早早就提我記得要儲水樽裝水，上年一裝就裝左幾枝大嘅七夕水。
講起上年嘅七夕水，唔能夠唔提起一件好笑事。
話說上年裝完七夕水無耐，就同姚爸爸、姚太、姚大哥及姚峰峰返左大陸，姚峰峰返左去一日就自己返左黎香港。 我帶左一枝七夕水返大陸間屋到，其餘當然全部放晒係香港間屋到啦。
點知返到黎香港後我覺得峰峰氣色好左，不過無問點解。
之後的某某日，我發現一樣好奇怪嘅事，點解有一樽七夕水無左三份一嘅?
當時，我以為姚太拎左d七夕水黎抹野，後咪偶然一次同姚太講起，佢話無用過，咁，個三份一枝七夕水去左邊，我相信大家都估到。
我當時係咁問峰峰嘅"你做乜飲左我個樽水丫?"，"你地返左大陸，無煲水，有晚口乾咪拎枝水飲囉"，"吾，咁你飲完有無肚痛丫?"，"無喎，做乜咁問丫?"，"吾，個枝係七夕水，我七夕個晚打返黎，無煲過架!"，"係? 但我真係無肚痛喎!"。
當然，我同miko私底下研究過，不過唔係究竟峰峰點解飲完個三份一樽水後無肚痛，而係點解峰峰會咁好彩會拎左樽七夕水黎飲嘅。
當然，我要重申一點，未經煲滾嘅水喉水係不宜飲用，峰峰飲完無肚痛只係佢好彩，所以，唔建議任何人飲未經煲滾嘅水，如果你睇完哩篇之後真係走去飲一d未經煲滾嘅水，有任何幸運或不幸嘅事發生，我都絕不會負責。
咁究竟七夕水有乜功效，甚至，七夕水究竟係乜黎嘅呢? miko就搵喺百度搵左篇"什麼叫七夕水"過我睇。
我只係想講句，上年用七夕水開綠豆粉洗面，塊面keep足一年皮膚都好好，至少，我覺得比再之前一年好；今年我決定去盡d，除左洗面之外仲要洗埋全身，即係拎黎沖涼，咁沖完涼有乜效果呢? 滑咗又靚咗囉(嘩，真係好唔知醜丫，但又真係覺得滑咗丫嘛!)。
大家對七夕水有興趣的話，記僅下年請早啦。
我家的舊物 一
八月 13th, 2010
我家出名多雜物，事關我爸媽有個習慣，少掉野，多買野，兩老嘅口頭嬋就係"又未爛，唔通掉左佢咩?"，但又唔諗下既然未爛嘅仲乜又繼續買新?
當然，有d野雖然無用、無乜用，甚至，好少用，唔會用，但真係好難捨得掉。
我阿嫲其中一件遺物。 唔知阿嫲幾時買個手袋，不過，我阿嫲大大話話都瓜咗三十五、六年，所以，個袋就一定至少有三十幾年歷史。
講真，以前d野嘅手功真係一流，個袋雖然成三十幾年，無甩線、無甩珠片都不在話下，d珠片仲要好閃個吓利害。
不過，個袋我媽同我都無用過，事關真係驚整爛，所以，都係我爸媽另一句口頭嬋"唔捨得掉，但唔諗住用!"。
