Clarins Clearsing Milk

一月 12th, 2008

最近，經常跟朋友介紹Clarins這枝Clearsing Milk，原因是我覺得真的好好用。

話說，多年前去Clarins買爽膚水時，sales姐姐送了枝clearsing milk的試用裝給我，不過，我當普通洗面奶洗，洗完之後只覺得好油。(我好鍾意用clarins的爽膚水，因為好鍾意陣味!)

上個月，上網見到有人賣這枝的試用裝，賣家說效果很好，只是很多人都當它是普通洗面奶來洗，才感受不到它真正功效。 橫豎也只是幾十元，就bid來試一試。

賣家說，首先倒出比平日洗面奶的三倍份量在掌心預熱一下，之後就塗滿整塊面，接下來就用手心不停(提手)向上搓向下揉塊面，直至原本奶白色的洗面奶變成油狀，再搓揉多幾分鐘，再用手指尖打圈的不停按摩塊面，能按多久就按多久，之後用清水洗乾淨塊面就行。

我一星期用一次，連計今日，用過4次。 最初的一兩次，用完之後覺得塊面好水好滑，而且也能維持到四五日也是這個好水好滑的狀態，但鼻上的黑頭、酒米兩三日後也跑回出來。

直到第三次用，當我打圈按摩塊面時，手指忽然感覺摸到左邊面上有些有點硬硬的東西，照鏡一看，左邊面黏滿很多黃灰色的東西，用化妝棉抹去那些黃灰色的東西後，繼續再按，之後就洗乾淨塊面。

洗乾淨面之後就覺得好奇怪，左邊面明顯比右邊面毛孔細了很多，而且用同一隻手指摸一摸兩邊面，左邊面明顯比右邊面滑。

剛才又用這枝來洗面，但這次就完全按不到像上次般的黃灰色物體出來。 我懷疑我右邊面跟額頭實在太髒，所以，還未能把污垢按出來。

不過，由將洗面奶塗上面搓揉，到去洗面，至少要廿多分鐘。 4次的使用經驗告訴我，洗面奶由奶白色變成油狀的時間，會因天氣不同而不同。 天氣乾燥一點的話，大約要15分鐘，像最近幾日這樣潮濕的天氣，至少要搓揉廿分鐘，洗面奶才會慢慢變成油狀。

我媽說按摩這麼久，死皮、"老泥"很自然也會按到出來，當然，如果什麼也不塗，直接按這麼久的話，應該會甩皮才對。

我想，應該要再多用幾次才可以令面上的污垢清除，不過，下次不會上網bid，因為我是用了200ml正價的三份一價錢來買了枝試用裝。 @.@

相關文章

Tags: ,
Posted in 女為悅己者容 | 17 則迴響

17 Responses to “Clarins Clearsing Milk”

  1. sputnik 說道：
    12/01/2008 at 10:51 下午

    好吸引啊~
    等我搵日去counter 睇下先!

  2. shizugi 說道：
    13/01/2008 at 4:19 上午

    sputnik: 我今日係旺角既卓x同莎x睇過，仲要行左好多間，試用裝原來無得賣，最離奇既係卓x竟然連大枝裝都無得賣，我係莎x睇到，依家特價$147 200ml。
    嗚，我原來唔止係用三份一既價錢黎買左枝試用裝，係用左差不多一半既價錢黎買丫，嗚~

  3. 冬 說道：
    14/01/2008 at 3:46 下午

    Clarins既嘢不嬲都好得﹐不過有D貴耶~~

  4. 仔妹媽 說道：
    15/01/2008 at 12:05 上午

    洗得乾淨,個人靚咗,原價買都抵啦~

  5. shizugi 說道：
    15/01/2008 at 2:16 上午

    冬: 我記得妳好似介紹過佢d眼霜的，好用嗎? 對我黎講，唔止有d貴，係好貴丫。

    仔妹媽: 哎呀，但我用憤d平野，平日用的洗面都係唔過$100的。

  6. sputnik 說道：
    15/01/2008 at 12:20 下午

    可能因為我塊面麻煩啦, 所以只要work 既野, 唔係太貴我都會買架!
    等我今日去莎x 望下先!

  7. shizugi 說道：
    15/01/2008 at 6:40 下午

    sputnik: 妳一係買枝版試下，無問題先買枝大黎用啦。
    我寄左幾塊面膜俾妳，寄去妳屋企的，留意下信箱。

  8. sputnik 說道：
    15/01/2008 at 9:50 下午

    小豬耳, 收到你既mask 啦, 謝啊!!! ^O^

    今日我去買左支大用, 急不及待一返屋企就試啦.
    正到爆, 就係推到成面都係黃色粒粒.
    勁啊!!!

  9. shizugi 說道：
    16/01/2008 at 3:58 上午

    sputnik: 我諗妳用多幾次就會好番晒架啦，妳搞到我真係心思思想去買番枝大既黎用。(不過，我個枝細既仲有一半!)。

  10. 蓮媽 說道：
    25/01/2008 at 4:40 下午

    小豬耳好介紹喔, 我前幾日去左sasa買! 琴晚用, 我個面捽左好多核突野出黎, 唔係黃色, 係灰色添呀~~~~好想今晚再用, 希望今晚唔再灰, 係黃色啦, 哇哈哈哈~

  11. shizugi 說道：
    26/01/2008 at 3:48 上午

    蓮媽: 我第一次用都係捽出黎d野都係灰多過黃的 ^^"。

  12. Mo Ma 說道：
    26/01/2008 at 10:28 下午

    等我都買枝試下先…

  13. sleepy 說道：
    15/08/2008 at 11:32 上午

    我想問乾性皮膚arm 唔 arm 用呢??

  14. shizugi 說道：
    15/08/2008 at 8:13 下午

    sleepy: 佢有兩隻，綠色個枝係中/乾性皮膚既。

  15. sleepy 說道：
    16/08/2008 at 1:52 上午

    我今日去左問la, 佢話呢隻叫"吸盤" 洗面奶, 是嗎??
    咁綠色果色for 乾性, 會唔會唔可以撢捽到d dirty 野出黎呢??

    因為有時我同 d 好油既面霜, 如果手痕摸下佢, 都係咁捽到 d 死皮出黎, 唔知大家有無呢個經驗呢??

    thanks^^

  16. shizugi 說道：
    16/08/2008 at 4:22 上午

    sleepy: 我哩幾次買都係買綠色個枝，因為成日都無留意，淨係叫個sales拎俾我，不過，買左唔用又唔係，我一樣照用。
    死皮真係無捽過出黎，但又無白色咁好用就真，可能唔岩我皮膚。
    其實，唔好諗住一定要捽到d灰色既野出黎先好，因為皮膚低層有幾多污垢人人唔同，同埋如果有用開深層清潔既，手手

  17. shizugi 說道：
    16/08/2008 at 4:32 上午

    (按左enter，繼續講)
    如果有用開深層清潔既，未必捽到野出黎。
    我有個朋友本身有定期做深層清潔mask同埋有用開深層清潔洗面，佢用白色個枝，用左一枝都乜都捽唔到的。
    所以，唔好介意捽唔捽到野出黎丫。

« -- »

Leave a Reply